==>> News Ne Künning ohne Kopp * Kölsch I * Café Konditorei Confiserie Fromme

Konditorei * Confiserie

about Cafe Fromme

UMFRAGEN

Fromme's Social Bookmarks

Geburtstagstorte Geburtstag   Geburtstagskuchen Geburtstag   Hochzeitstorten Hochzeitskuchen   Torten Köln   Pralinen Köln   Gebäck Köln   Hochzeitstorte Köln  

 

 

Ne Künning ohne Kopp * Kölsch I * Café Konditorei Confiserie Fromme
Benutzerbewertung: / 19
SchwachPerfekt 
News - Aktuell
Geschrieben von: Pitterche   
Ne Künning ohne Kopp


Oder fällt Weihnachten dies Johr us ?


Ne Weihnachtsbreef vum Pitterche an de Tant Billa




Leev Tant Billa !



Fröhliche Weihnachte, och vun de Mamm, dem Papp un unserem klein Marieche. Ävver, wenn Du et janz jenau wesse wills, et es bei uns noch janit erus, ov mer hillige Ovend fieere künne oder ov mer nit dat janze Weinachtsfess noch in dr letzte Sekund verläje mösse !




Dat es nämlich esu : Unser Krippche, dat es ene Mordsapparat un janz fies schwer. Jedes Johr es et ne verdammte Brassel, bes mer dat Dinge vun ungen us em Keller bes bei uns op de drette Etach eropjeschlepp han. Un Jestere ham`mer dä Salat dann jehatt ! Meer wore met alle Mann erav in dr Keller, wo meer die Kripp op enem Schränksche medden im Enjemachte stonn han. De Mamm moht in de Ääpelskess eren un de Papp op de Kolle klimme, domet se övverhaup an die Kripp eran kunnte. Ich selfs moht unge stonn blieve un em richtije Aurebleck ?Hau Ruck? sage, domet se de Krepp schön gleichmässig erungerbrassele kunnte.


Doch op eimol kom dr Papp op de Kolle in et Rötsche un de Mann hatt met einem Schlag janz allein de Verantwortung för dä Stall vun Bethlehem met all dä Fijure, dä Schofe, dem Ooß un dem Esel un de hillige drei Künninge. Dat wor zevill för de Mamm!


Se kepp met demm janze Schlamassel öm, hängk quer in de Ääpelskess, hätt dat schwere Brett met dä Krepp scheef im Nacke hänge un schängk wie ne Schüredrescher. Jedenfalls ham`mer en öntlich Püngelsche Stress, bes mer die Krepp, de Mamm, all die Fijure und dat janze Viehzüch widder us dr Ääpelkess erus hatte !


Dat eng vum Leed: De Mamm hat e paar Schramme em Jeseech, dr Stall vun Bethlehem wor op einer Sick baufällisch jewoode und dä einzije Hirte dä mer hatte, usjerechnet dä, dä hatt dr Kopp av. Mer jowen uns an et Sööke un han en dä nächst Stunde drei Zentner Ääpel janz durchjewööhlt, ävver nix jefunge !


Un dann jing dä janze Palaver loss: Dä Papp säht : en Krepp mit Schoofe ohne dä Hirt, datt jing nit. Dat wör jäje die Tradition. Un ne Hirt ohne Kopp em Krippsche, dat jingk schon janit. Ne neue Hirt aanschaffe jingk och nit, weil die janze Fijure uralt un us Gips wöre un esujet künnt mer Hück nirjens mieh krieje.


Jetz sach meer ens , Tant Billa, wo meer , zwei Dag vör Weihnachte, wem`mer keine neue Hirt kritt, dann su ne Kopp för der Hirt krijje sull ? Dat hätt de Mamm och jesaaht. Do meint uns Marieche, dann maache meer en Krepp met bloß Viehzüch ohne ne Hirt. Do häts`te de Mamm ävver ens hüre sulle: dat wör tüpisch Jugend von hück, ken Ahnung vun Ackerbau un Viehzuch!

Schofe ohne Hirt, dat jing üvverhaup nit, die jinge doch türme, un en Krepp möch doch ääch sin, söns wör dat en Beleidijung för et Chresskindche.


Alsu säht dr. Papp: Dann dum`mer evvens eine vun dä hillije drei Künnige köppe, dun dä Kopp däm Hirt verpasse un jonn am 2 Weihnachtsdag noch ens em Keller sööke. Wem`mer dann dä Hirtekopp finge, dann tuusche mer noh Weihnachte dä Kopp widder öm un am sechste Januar, wem`mer drei Künnige fiere, hann se all de richtije Köpp widder opjesetz. Ävver do hät de Mamm jesaht dat dat och nit jing, weil doch de Künnije en Krun om Kopp hätte un ene Hirt met nr Krun om Kopp unsozial sei.


Do säht dann dr Papp, dat wör net esu schlemm. Mer künnt jo met Schmerjelpapier die Krun vun däm Künningskopp avschüre, dann hät dä Hirt met dem Künningskopp evens en Pläät.


De Mamm hät evver trotzdem Bedenke : Un wat passeet, wem`mer dann in dr Ääpelskess dem Hirt singe richtije Kopp widderfinge un dä Künning dann singe Koppwidderkritt und dä hät kein Krun?


Dat wör natürlich e Problem, meint dr Papp. Doch uns Mariche hat en Idee : meer künnten doch dem Künning dann en Krun us Lametta zusammefriemele un op dä Plätekopp dropklääve !


Jenau dat ham`mer dann och probeet. Dat wor villeich en pingelije Arbeit ! Ävver dat jing dann och nit ! Jedesmol, wenn de Düür opjingk, jingk die Krun us Lametta vum Durchzog fleeje, weil dä usselije Pappkleister dat Lamettazüch op dä blanke Plät nit halden däht.


Un jetz es dr Papp schwer sauer un hät jesaht, dat nit iher bei uns Hillije Ovend jeffet weed, bes dat Problem met däm Kopp jelös wör. Un esu wie ich unser Familich kenne, kann dat noch en paar Johre duure, weil dä Papp zwei linke Häng hä tun e su en krebbelije Arbeit em janitt litt. Also waade meer en sav, wat noch kütt!


Deer leev Tant Billa wünsche ich op jeden Fall schon ens schöne Weihnachte un verblieve, met nem schöne Jroß

Dinge Pitter

PS: Grad nu han se sich jeeinigt, dat ich dä janze Schlamassel Schold ben, weil ich zo fröh ?Hau Ruck? jebröllt han.
 
Copyright © 2017 Konditorei Café Konfiserie Fromme. Alle Rechte vorbehalten.
Joomla! ist freie, unter der GNU/GPL-Lizenz veröffentlichte Software.
 
cf11GT-1E.jpg

Neueste Nachrichten